Sihlalo weNdlu, akhengirithe ngelimi lesizukulwana sikaMusi noMhlanga ngenzele bona nomuntu ohlala eMagomedzana ezwe kuhle bona into esikhuluma ngayo le yini. UmThetho lo ufuna bona kube namakhotho azakusebenza ngemilandu emayelana nokugagadlhela namkha ukukata. Okhunye kukuthi kufanele silemuke bonyana amakhotho anjengalawa akhe abakhona begodu ayegade asiza khulu ngokurhabisa imilandu yokugagadlhela.
Kunekinga ekulu eyenzekako begodu nesirarako gadesi: Abesanyana bagagadlhela iinlukazi, kuthi abobaba bona bagagadlhele abantazanyana. Kunekulumo emamala ethi, lokha umuntu nakanobulwelwe bentumbantonga [HIV/Aids], nakangaya emsemeni nomuntu wengubo ongakhange ahlangane nendoda angalapheka. Ngifuna bona ngithi esitjhabeni: "Ningezwa, into enjalo imamala begodu ayikho."
Angibuye ngitjho godu bona sesaphasisa umThetho onikela abagwebi, okubomantji namajaji, bona badlulise iingwebo eziqinileko [minimum sentences] Alo-ke nasele usebenza umThetho lo, labo abakha umrorho ngekani namkha abagagadlhelako, bangazithola babhadla ejele isikhathi eside. Kungakho thina siyihlangano ebusako ye-ANC, siwusekela umThethomlingwa lo bonyana uphasiswe ukwazi ukuragela phambili usebenze. Uzokubalisizo kwamambala khulukhulu kibomma okungibo kanengi abababongazimbi bezenzo zokukata. Begodu siyesawutjhugulula umThethomlingwa lo bonyana kuthi lokha nakukhulunywa ngokukata, kufakwe hlangana zoke izehlakalo ezithintana nezitho zangasese. Ngiyathokoza. [Kuyawahlwa.] (Translation of isiNdebele paragraphs follows.)