Modulasetulo, e re ke ise tlhompho ho Ditho tsa Lekgotla la Ketsamolao la Afrika Borwa; ke ise tlhompho ho Letona, hong le Motlatsa Letona; mme ke ise tlhompho ho baetapele ba mafapha, le ho setjhaba ka kakaretso.
Puong ya hae ya setjhaba ka kgwedi ya Phupu, selemong sena sa sa ditjhelete, Mopresidente wa Afrika Borwa, mohlomphehi Jacob Zuma, o hlalositse hore sehleng sena sa Palamente ho hlokahala hore ho kenngwe tshebetsong maano a tlisang phetoho ya moruo wa setjhaba ka sekgahla se matla, e le hore ho potlakiswe mananeo a tlo fokotsa bofuma, tlhokeho ya mesebetsi le ho se lekalekane.
Jwale, Lefapha la Ntshetsopele ya Setjhaba le sehlohlolong sa ho tlisa diphetoho tsena ho baahi ba Afrika Borwa ka kakaretso. Lefapha le filwe maikarabelo a ho ntshetsa pele Sephetho sa 13 sa Morero wa Ntshetsopele ya Setjhaba [National Development Plan] o itshetlehileng ho mokgwatshebetso wa tshireletso o akaretsang o bile o arabela.
Ha re sheba mananeo ao lefapha le batlang ho a kenya tshebetsong sehleng sena sa ditjhelete ho lwantshana le bofuma, tlhokeho ya mesebetsi le ho se lekalekane, ho a bontsha hore e le ka nnete, tsena ke diphihlello tse tekilweng ho Tokomane ya Setshwantsho sa Molao wa mokgatlo wa ANC, ho tswa Sebokeng sa Mangaung ka selemo sa 2012. Moo, ho neng ho buuwa ka tlhabollo ya thekolohelo [social transformation] e seratswaneng se itshetlehileng ho tlhahiso ya Tokomane ya Lewa la Thuso e Batsi ya Tshireletso ya Setjhaba ya